43,505 views 609 on YTPak
228 8

Published on 09 Feb 2012 | over 4 years ago

Lyrics/Poet: Hazarat Allama Mohammed Iqbal

Kyon Ziaan kaar banun, sood faramosh rahoon Fikr-e-farda na karun, mahw-e-ghum-e-dosh rahoon,
Naale bulbul ke sunoon, aur hama tan gosh rahoon, Hamnawa main bhi koi gul hoon ke khamosh rahoon
Jurrat aamoz meri taab-e-sakhun hai mujhko, Shikwa Allah se khakam badahan hai mujhko.

Ae Khuda shikwa-e-arbab-e-wafa bhi sun le, Khu gar-e-hamd se thoda sa gila bhi sun le.
Thi toh maujood azal se hi teri zaat-e-qadim, Phool tha zeb-e-chaman, par na pareshan thi shamim;
Shart insaaf hai, aye, sahib-e-altaf-e-amim, Boo-e-gul phailti kis tarah jo hoti na nasim?

Hum se pahle tha ajab tere jahan ka manzir, Kahin masjood the patthar, kahin maabood shajar,
Khugar-e-paikar-e-mahsoos thi insaan ki nazar, Maanta phir koi un-dekhe Khuda ko kyonkar?
Tujhko maaloom hai leta tha koi naam tera? Quwwat-e-baazoo-e-Muslim ne kiya kaam tera!

Bas rahe the yahin salijuq bhi, toorani bhi, Ahl-e-chin cheen mein, Iran mein sasaani bhi,
Isi maamoore mein aabad the Yunaani bhi, Isi duniya mein Yahudi bhi the, Nusraani bhi,
Par tere naam pe talwar uthai kis ne, Baat jo bigdi huyi thi woh banayi kis ne?

Te hameen ek tere maarka aaraaon mein! Khushkiyon mein kabhi ladte, kabhi dariyaon mein,
Di azaanen kabhi Europe ke kaleesaaon mein, Kabhi Africa ke tapte huye sahraaon mein.
Thi na kuchh teg zani apni hakumat ke liye, Sar ba-kaf phirte the kya dahar mein daulat ke liye?

Qaum apni jo zaro-male-jahan par marti, But faroshi ke iwaz but shikni kyon karti?
Naqsh tauheed ka har dil pe bithaya humne, Zer-e-khanjar bhi yeh paigham sunaya humne.
Tu hi kade ke ukhada dar-e-Khyber kis ne, Shaher qaiser ka jo tha us ko kiya sar kis ne?
Tore makhluq khudawandon ke paikar kis ne? Kat kar rakh diye kaffaar ke lashkar kis ne?

Aa gaya ain ladaai mein agar waqt-e-namaz, Qibla roo ho ke zamin bos hui qaum-e-Hejaz,
Ekhi saf mein khade ho gaye mahmud-o-Ayaz, No koi banda raha aur no koi banda nawaz.
Banda-o-sahib-o-muhtaaj-o-ghani ek huye, Teri sarkar mein pahunche toh sabhi ek huye.

Mehfil-e-kaun-o-makaan mein shar-o-shaam phire, Mai-e-tauheed ko lekar sift-e-jam phire.
Dasht toh dasht hain, darya bhi na chhode humne, Bahr-e-zulmaat mein dauda diye ghore humne.
Safah-e-dahar se baatil ko mitaya humne, Nau-e-insaan ko ghulami se chhudaya humne,
Tere kabe ko jabeenon se basaya humne, Tere Quran ko seenon se lagaya humne.
Phir bhi hum se yeh gila hai, ke wafadar nahin, Hum wafadar nahin, tu bhi toh dildar nahin!

Rahmaten hain teri aghiyar ke kashaanon par, Barq girti hai toh bechare Musalmaanon par!
Yeh shikayat nahin, hain un ke khazane maamur, Nahin mehfil mein jinhen baat bhi karne ka shaoor,
Qahar toh yeh hai ke kafir ko milen hoor-o-qasoor, Aur bechaare Musalmaan ko faqt waada-e-hoor!

Tane-agiyaar hai, ruswai hai, nadaari hai, Kya tere naam pe marne ka iwaz khwari hai?
Hum toh jeete hain ke duniya mein tera naam rahe, Kahin mumkin hai saqi na rahe, jaam rahe?
Teri mehfil bhi gayi, chahne wale bhi gaye, Shab ki aahen bhi gayi, subah ke nale bhi gaye,

Dil tujhe de bhi gaye, apna sila le bhi gaye, Aa ke baithe bhi na the, ke nikaale bhi gaye.
Aaye ushaaq, gaye waada-e-farda lekar, Ab unhen dhoond chirag-e-rukh-e-zeba lekar!
Dard-e-Laila bhi wohi, Qais ka pahlu bhi wohi, Nejd ke dasht-o-jabal mein ram-e-aahoo bhi wohi,
Ishq ka dil bhi wohi, husn ka jaadoo bhi wohi, Ummat-e-Ahmed-e-Mursil bhi wohi, tu bhi wohi,

Phir yeh aazurdagi-e-ghair-sabab kya maani, Apne shaidaaon pe yeh chashm-e-ghazab kya mani?
Ishq ki khair, woh pehli si ada bhi na sahi, Jada paimaai taslim-o-raza bhi na sahi,
Kabhi humse, kabhi ghairon se shanasayi hai, Baat kane ki nahin, tu bhi toh har jayi hai.

Ade-gul khatam hua, toot gaya saze-chaman, Ud gaye dalion se zamzama pardaze-chaman.
Ek bulbul hai ke hai mawe-tarannum ab tak, Uske seene mein hai naghmon ka talatam ab tak.
Qumrian shakh-e-sanober se gurezaan bhi hui, Patian phool ki jhad jhad ke pareshan bhi hui;

Woh purani ravishen bagh ki veeran bhi hui, Dalian parahan-e-barg se uriaan bhi hui.
Qaid-e-mausim se tabiyat rahi aazad uski, Kash gulshan mein samjhta koi faryaad uski.
Chak is bulbul-e-tanha ki nawa se dil hon, Jagne wale isi bange dara se dil hon.
Yani phir zinda naye ahd-e-wafa se dil hon, Phir isi bada-e-dirina ke pyaase dil hon.
Ajmi khum hai toh kya, ma'y toh Hejaazi hai meri, Nagma Hindi hai toh kya, la'y toh Hejaazi hai meri.

Loading related videos...